दस्स में कि'यां भुलाने ज़िंदगी दे हादसे
थे तिरे-मेरे यराने ज़िंदगी दे हादसे।
मारना आइयां मिगी निं हाड़-धोखैं तारियां
पार में कि'यां टपाने ज़िंदगी दे हादसे।
मारेआ था जद कुसा ने मी कलावा घोटियै
याद मी आए पुराने ज़िंदगी दे हादसे।
हिरख-खेढा हीखियें नै चार खेढां खेढियै
उम्र सारी पे नभाने ज़िंदगी दे हादसे।
ना रगें इच खून दौड़ै, ना सुआसैं गर्दिशां
हून केह् अगड़े बधाने ज़िंदगी दे हादसे।
बाद मेरै पीड़-मंडी हीखियें गी बेचियै
नांऽ कु'नै अपने लखाने ज़िंदगी दे हादसे।
मौत सद्दी घर 'बगान्ना' पा कलावा घोटियै
करन कजिया की धङानै ज़िंदगी दे हादसे।
