हर मोड़ पर ठगदी ऐ ज़िंदगी
कदें दिंदी ऐ आस
ते कदें दुआसियां बी
पैह्लें कोला चंगा होने दी हीखी
मनुक्ख गी अग्गें चलांदी ऐ।
मना च किन्नी गै ख्वाहिशें दे
बाग सजांदा ऐ
हीखी दे फुल्ल-बूह्टे लांदा ऐ
खुशियें दियां पींघां झूटदा ऐ
पर जदूं वास्तविकता च परतोंदा ऐ
जित्थै छोड़ियै गेदा हा
ते दिखदा ऐ
जे इक बारी फ्ही ठगोई गेआ |
किन्नी गै बारी बदलें चा
धुप्प दे लशकारें
उम्मीद बधाई होग
किन्नी गै बारी
ठंडी ब्हाऊ दे झोंके
किश चंगे ऐह्सास कराए होङन ।
मनुक्ख ते आस लाई गै लांदा ऐ
पर ज़िंदगी
ज़िंदगी ठग्गी लैंदी ऐ
लग्गे दा रौंह्दा सारी उमर
संसार दी चीजें दे मगर
एह् बी कट्ठा करी लैंऽ
ओह् बी कुतै रेही निं जाऽ
झूठे रस्ते पर चलदा रौंह्दा ऐ
ज़िंदगी दी बेह्तरी लेई
बड़ी अग्गें निकली जंदा ऐ
पिच्छें मुड़दा ऐ ते किश निं लभदा
जिस ज़िंदगी लेई इन्ना किश कीता
उ'न्नै आखरी बारी फ्ही
हमेशा लेई ठग्गी लैता
ज़िंदगी दा सभाऽ गै किश ऐसा ऐ |
