छुत्त कीता लंघी गेआ समां झट दौड़ियै
दुआसी आह्ली पिच्छै इक लैह्र जन छोड़ियै ।
आलम दुआसी आह्ला मनै अज्ज छाए दा
उ'ऐ नेहा म्हौल उ'न्नै बाह्र बी बनाए दा
दुआसी मिगी खा 'रदी अज्ज कोड़ी- कोड़ियै
छुत्त कीता लंघी गेआ समां झट दौड़ियै ।
रुक्खें- बूह्टें दी बी अज्ज बक्खरी नुहार ऐ
हर शैऽ मी लब्भै जि'यां होई दी बमार ऐ
फुल्लै साहीं कोई मन लेई ‘आ त्रोड़ियै
छुत्त कीता लंघी गेआ समां झट दौड़ियै ।
जन्नीं- ब'ट्टे रस्ते, चुप -गुम होई दी गैह्ल ऐ
पैह्लें आह्ली लब्भै दी निं अज्ज चैह्ल-पैह्ल ऐ
दुआसी आह्ली नदी लेई गेई सब किश रोढ़ियै
छुत्त कीता लंघी गेआ समां झट दौड़ियै ।
मसूस मेरे मनै गी ऐ जो किश होआ दा
चाह्न्नां में ब्यान करां, पर नेईं बलोआ दा
खबरै फ्ही कु'न गेआ गला कोई मरोड़ियै
छुत्त कीता लंघी गेआ समां झट दौड़ियै ।
दुआसी च चबक्खी म्हौल अज्ज हौके भरै दा
दुख नेईं जरोने आह्ला मन मेरा जरै दा
मनै च दुआसी आवै अज्ज दौड़ी- दौड़ियै
छुत्त कीता लंघी गेआ समां झट दौड़ियै ।
बाग ते बगीचे मिगी चंगे नेईं लग्गै दे
फुल्ल बी चघांदे मिगी चग्घे जन लग्गै दे
जलाऽ दी दुआसी अज्ज मिगी ठ्होरी-ठ्होरियै
छुत्त कीता लंघी गेआ समां अज्ज दौड़ियै ।
ब्हार बसैंती बी बझोंदी नेईं बांदी ऐ
चाननी दुआस जन लब्भै पेदी मांदी ऐ
तंद संजोगी अज्ज गेआ कोई त्रोड़ियै
छुत्त कीता लंघी गेआ समां झट दौड़ियै ।
सब किश ऐ अग्गै- पिच्छै मन मेरे कन्नै नेईं
सब किश ऐ उ'ऐ नेहा, फ्ही बी मन मन्नै नेईं
मुड़ी- मुड़ी नस्सै, में आह्न्नां मोड़ी- मोड़ियै
छुत्त कीता लंघी गेआ समां झट दौड़ियै । .
