सोच पैंडे ओह् किन्ने क मारी गेआ
जो सदी हादसें दी गुज़ारी गेआ।
पंड चेतें दी बत्ता बसारी गेआ
मेरी गैह्ली चा कोह्का बपारी गेआ।
जिसगी चेता हा सब किश, ओह् हारी गेआ
जो बसारी गेआ , सार सारी गेआ।
' मैं ' कमीनी गी जेह्ड़ा बी मारी गेआ
भार उमरें दा भुञां तुआरी गेआ।
होश मेरी मिगी हून तुपदी फिरै
यार ऐसी हा चाढ़ी खुमारी गेआ।
इक सबेरा बी उसदे पसारै निंहा
जो हा सूरज सबूरा डकारी गेआ।
एह् डुआठन मर्हक्खें दी टप्पी जि'नें
पैर आखो ओह् लम्मे पसारी गेआ।
निग्घ उसगी कलावें दा जुड़ेआ कदूं
जेह्ड़ा ग़ुस्से च बाह्मां लुआरी गेआ।
डौल आखो ‘बगान्ना’ दी बड्डी नेही
टैम कड्ढी गेआ , दिन गुज़ारी गेआ।
