निहालप

कदें कुतै
सुखैं-सांदैं
मनै दी जरनैली शिड़का राहें
तेरे औने दी खबर
दमाका दी न्हेरी खुंधरैं
चानन करदी बझोंदी ऐ जेल्लै
तां तेरे सोआगत लेई
बज्जन लगदी ऐ बौंसरी
आपमुहारी
भावें दी कुंगली नुक्करा,
कन्डी नै जुड़ी दियें आंदरैं 
सैलतन दी बास सुरकदी ऐ
ते अक्खें दे सरैं 
सतरंगे सुखने 
मसां लोआरा खंदे न
तेरी निहालपा
ते तूं
आइयै बी औंदी नेईं
पिछड़ी परतोई जन्नी ऐं
डुआठना परा गै
पर मी
निहालप रौह्‌ग सदा गै।