जाड़ैं दिक्खो रंग-बरंगे फुल्लें दियां ब्हारां
हर ब्हार च पक्खरू उडदे कन्नै कूंज डुआरां
घा हरे ते पत्तर सैल्ले लभदे सारे पास्सै
दिनें-दपैह्रीं बद्दल दौड़न न्हेरा होंदा ऐ गासै
ठंड कलेजै पौंदी जेल्लै झुलदियां ठंडियां सारां
हर ब्हार च पक्खरू उडदे कन्नै कूंज डुआरां
जाड़ैं दिक्खो रंग-बरंगे फुल्लें दियां ब्हारां ।
इक ब्हार बलूंघड़ दिक्खो चढ़दा जाई शमान
डूने-पत्तलां तीलें कन्नै औंगलीं बुनी टकान
इ’नें डूनें ते पत्तलें साढ़े केईं कम्म सुआरे
ओ गंढ ब’न्नियै परोह्त होर लैंदे न ओह् लुआरे
एह् बी घर-घर जाइयै दिक्खो करदे न अपनियां कारां
हर ब्हार च पक्खरू उडदे कन्नै कूंज डुआरां
जाड़ैं दिक्खो रंग-बरंगे फुल्लें दियां ब्हारां ।
मोर बी पाह्लां पांदे दिक्खो अपने फंघ डुआरी
सोचदे पैर दिक्खियै थल्लै लेई गेई ओह् गटारी
छम-छम करदे चोन अत्थरूं सुद्धे रोन बचैरे
जिया करदे काईं दे स्हारै ओह् बी देआ दी लारे
कलाईं दी तुस गल्ल निं पुच्छो मल्लियां इ’नें धारां
हर ब्हार च पक्खरू उडदे कन्नै कूंज डुआरां
जाड़ैं दिक्खो रंग-बरंगे फुल्लें दियां ब्हारां ।
कुतै कबूतर जाई ब’वा दे, आह्लड़े बुनी टकान
ओ बिच्च आह्लड़ैं ञ्यानें इं’दे सुरां सुद्धियां लान
कुदरत दी एह् लीला दिक्खो मौज बज्झी दी प्हाड़ैं
मिट्ठी खंड गलानी सुनो रौनक लग्गी जाड़ैं
फड़-फड़ दिक्खो उड्डा दियां गांदियां न गीत गतारां
हर ब्हार च पक्खरू उडदे कन्नै कूंज डुआरां
जाड़ैं दिक्खो रंग-बरंगे फुल्लें दियां ब्हारां ।
जे कदें तुस गनाहीं गी दिक्खो, सुत्ती दियां बी जागन
आपमुहारा जेह्ड़ा चलदा उस्सै गी एह् दाह्गन
एह् बी अपनै राज करा दियां बिच्चुएं दियां बूआं
सप्प-खड़प्पे थाप्पियां देन— जीन मेरियां नूहां
जे कुसै गी डंगी जान कि’यां डंग तुआरां
हर ब्हार च पक्खरू उडदे कन्नै कूंज डुआरां
जाड़ैं दिक्खो रंग-बरंगे फुल्लें दियां ब्हारां ।
बस्सा दे न लाह्म्मां-धारैं दिक्खो पिज्जड़ां-पाह्ड़े
खब्बल सैल्ले एह् चरा दे, दंदियैं इं’दे जाड़े
लेई बंदूक 'कुंडरिया' बैठा करन केह् एह् बचैरे
नस्सन छेड़ सुनियै दिक्खो डरा दे मारे-मारे
‘कुंडरिया’जी तुस गल्ल निं पुच्छो दुशमन इं’दे ज्हारां
हर ब्हार च पक्खरू उडदे कन्नै कूंज डुआरां
जाड़ैं दिक्खो रंग-बरंगे फुल्लें दियां ब्हारां ।
