कु’न आखदा डोगरी दे दीवानें दी थोड़ ऐ
हिरखै दा गीत कोई गाइयै ते दिक्ख
छेड़ हां मनै आह्ली वीणा दे तार तूं
सच्चे-सुच्चे सुर लाई, बलाइयै ते दिक्ख ।
नमीं कोई कत्थ-क्हानी, ञ्याणें लेई बनाऽ हां
बारां वीर जोधें दियां, नमें सिरै सनाऽ हां
जोआने लेई लिख कोई गीत बलिदानै दा
किस्सा हीर-रांझे नेहा, नमें गीतें च गा हां
गीतड़ू बनाई लै, मिट्टी दी खशबोई दे
दूर परदेसियें दे हिरखै गी जगाऽ हां
इ’यै नेहा आह्वान कोई कराइयै ते दिक्ख
हिरखै दा गीत कोई गाइयै ते दिक्ख ।
कु’न आखदा डोगरी च कम्म-काज निं चलदे
कु’न आखदा डोगरी नै राज-पाठ निं चलदे
फिजिक्स, कैमिस्ट्री डोगरी च लिखना औखा ऐ
तत्त समझाना पर, डोगरी च गै सौखा ऐ
करचै जे हीला, समाधान बी होई जाना
मां-भाशा डोगरी दा मत्था उच्चा होई जाना
हौंसले गी होर थोह्ड़ा अजमाइयै ते दिक्ख
हिरखै दा गीत कोई गाइयै ते दिक्ख ।
डोगरें गी हीनता गी अग्ग लानी पौनी ऐ
शानै कन्नै असें डोगरी बोलने गै पौनी ऐ
अंग्रेजी-हिंदी—भाशां दोऐ भांए शैल न
हिरख-दुखै दी गल्ल डोगरी च गै खोनी ऐ
ञ्याणें हत्थ डोर साढ़े डोगरे देस्सै दी
रीत-रवाजें दी सैंस दस्सने गै पौनी ऐ
बच्चें गी नमें तरीकैं समझाइयै ते दिक्ख
हिरखै दा गीत कोई गाइयै ते दिक्ख ।
पॉप-रैप लोक जेह्ड़े डोगरी च गा करदे
ओह् बी मां-डोगरी दा मान बधाऽ करदे
फेसबुक, व्हट्सऐप, टिक-टोक चलाऽ करदे
इस दि’ब्ब जगै च औह्तियां न पा करदे
नमें तरीकें, नमें गीतें, दी बी लोड़ ऐ
नमियें पौंगरें गी हफाजतें दी लोड़ ऐ
पूरब ते पच्शम गी रलाइयै ते दिक्ख
हिरखै दा गीत कोई गाइयै ते दिक्ख ।
