पिता –
कविता ब’न्नी सकदी ऐ समुंदर
करी सकदी ऐ अधीन उफनदे दरेआ
ज्वालामुखी दे मुहाने पर बेहियै
होई जंदी ऐ भसम-
बगी निकलदी ऐ लावे आंह्गर
फ्ही-फ्ही जनम लैने गी।
कविता इस खिन सूरज
उस खिन केरी सकदी ऐ
चन्नै गी काकलै पर
कठेरी लैंदी ऐ
तारें गी खीसे इच
घने-बदलुएं आंह्गर घनोंदी
बरखा गी बुक्कै इच भरियै
भूमंडल इच विचरण करदी
फ्ही धूड़ चटदी
फ्ही-फ्ही डोआरी भरदी।
कविता सशक्त ऐ
ओह्दे इच ऐ अनसंभ समर्थ ।
मेरे पंज फुट पंज इंच पिता अग्गें
कविता बौनी होई जंदी ऐ
बेबस,असमर्थ ।
नेईं नपोंदा ओह्दे शा
नेईं उकेरी पांदी ओ
पिता दे वजूद गी।
बरखें दे दिनैं
धरतै रा नेईं
पिता उं’दे स्कूटर दी डिक्की शा झांकदे
थिंधे खाखी लफ़ाफें इचा फुटदी ही
सोंधी खशबो
बोल हां कविता-
कु’न दसदा होग पिता गी--
जे अज्ज ञ्यानें समोसे खाना चांह्दे न
अज्ज कचौरी- जलेबी होनी चाहिदी
कि’यां पता लगदा होग पिता गी बिन दस्से
जे अज्ज बेसब्री नै निहाला 'रदे न बच्चे
चंपक-नंदन गी ।
अजें बी
पिता पढ़ी लैंदे न
साढ़ियें अक्खीं इचा
दुख दियां इबारतां
मापी लैंदे न मुस्कान्नां
गड़ाकें इच तलाशी लैंदे न
उं’दे सच्चे-झूठे होने दे अक्स ।
पिता ओह् मांझा न
जेह्दे बूतै खोजी सके अस नमें गास
पिता इक डोरी न
जेह्दे च झट्ट परोन जंदियां न
बक्ख-बाह्रियां विचारधारां
परिवार दे जियें दियां।
बचपुने इच
अलज़ब्रा चुटकियें इच समझाने आह्ले पिता
करदे न अज्ज बी
साढ़ी हर समस्या दा निदान
साढ़ियां लौह्कियां-बड्डियां खुशियां बटोरने इच
पिता खर्च होई गे
हर दिन थोह्ड़ा -थोह्ड़ा
ओह् नेईं होई सके कविता ।
पिता इक मिट्ठी आस न
खूब मोकला गास न
हौसला न साढ़ा
हौसलें दी बुलंदी न ।
खबरै कदें होई सकै
पिता पर कविता !!
