डोगरें दी शान डोगरी
मिट्ठड़ी जबान डोगरी।
अमरत सीर ऐ डोगरी
रांझे दी हीर ऐ डोगरी
बांदी ब्हार ऐ डोगरी
हार -शंगार ऐ डोगरी
डोगरें दी शान डोगरी
मिट्ठड़ी जबान डोगरी।
पुरे दी ब्हाऽ ऐ डोगरी
डोगरें दा साह् ऐ डोगरी
अंबडी दी सीस डोगरी
तेरी-मेरी प्रीत डोगरी
मेरा गौह्-गमान डोगरी
डोगरें दी शान डोगरी ।
मेरी मां-बोल्ली डोगरी
कुसै दी निं गोल्ली डोगरी
शायरें दी काह्न्नी डोगरी
चन्हां दी रबानी डोगरी
कोयलै दी तान डोगरी
डोगरें दी शान डोगरी।
साढ़ी ईन ते होंद डोगरी
छलैपे दी रौंस ऐ डोगरी
फुल्लें दी खशबू डोगरी
डोगरें दी रूह् ऐ डोगरी
डोगरें दी शान डोगरी
मिट्ठड़ी जबान डोगरी।
ताई, कुसै दी चाची डोगरी
बोबो, कुसै दी मास्सी डोगरी
दूइयें भाशें नै बी लाओ प्रीतां
बो मां-बोल्ली दियां नेईं रीसां
मेरी गीता, मेरी कुरान डोगरी
डोगरें दी शान डोगरी ।
