कदें-कदें में सोचनां –
की ऐ मिगी इन्ना हिरख
डोगरी कन्नै ?
जिसलै में रोंदे-रोंदे
इस अनदिक्खी, अनजांती
अजनबी दुनिया च
पैह्ली बारी आया हा
मेरे कन्नें च
किश शब्द पे हे
पता नेईं कुʼन्नै
ते की बोल्ले हे
पर मिगी लग्गेआ हा
जे मेरा सोआगत कीता गेआ ऐ
समझा निं हे आए शब्द
पर
उंʼदी मठास कन्नें च घुली गेई ही,
मेरे कन्नें दे दोआरें दा
उद्घाटन करियै
परवेश करने आह्ले
ओह् पैह्ले मिट्ठे सोआगती शब्द
डोगरी दे गै हे
ते फ्ही
मिगी डोगरी मिलदी रेही
दुद्धै च
लोरी च
ब्हाऊ च
मिट्टी च
रुट्टी च
घसूतड़ियें च
खेढें च
खुशियें च
रौंसें च
हासे-गड़ाकें च
ते होने-जीने दियें सबीलें च
में डोगरी च
उज्जेआ
पलेआ-मठोआ,
डोगरी गी प्यार करना
मेरे आस्तै उʼआं गै
जिʼयां साह् लैना ।
