सांभदा गै रेहा में
सारी उमर सांभदा गै रेहा में
निक्का हा ते सांभदा हा--
ओह् खढौने जेह्ड़े मेरे लाडले हे
कदें सांभियां रेओड़ियां
डिग्गी निं जान
उद्धड़ी निक्करा दे खीसे चा ।
सभाऽ किश ऐसा हा
सांभदा गै रेहा
सांभियै रक्खेआ भैने- भ्राएं दा प्यार
उं'दी निक्खर गी बी
दिलै कन्नै लाइयै रक्खेआ।
रिश्तें गी बी सांभदे-सांभदे
किन्ना समां बीती गेआ
मनै च घटोई दियां गै रेहियां
मेरे मना दियां गल्लां
मनै च गै रेहियां
मेरे मना दियां गल्लां ।
हून बी सांभदां रौह्न्नां
बेल्लै-कबेल्लै
अपनी अक्खॆं दे अत्थरूं
कुतै बाह्र निकली गै निं पौन
ते मेरे अपने दोआस निं होई जान
खबरै मेरे मना दा बैह्म गै निं होऐ
सब किश सांभेआ
पर केह् करां
सांभी निं सकेआ अपने दिलै गी ।
