चेते—
हसदे-रोंदे, रोंदे-हसदे
चेतें दे विरसे समल्होंदे
चेते कैसे-कैसे होंदे।
भुल्ले-बिस्सरे, भटके चेते
कुतै-कुतै किश अटके चेते
कि’यां केह्- केह् हीले करनीं
किन्नी बारी झटके चेते
नित- नित आइयै नोच्चन इ’यां
उड़दे पैंछी, गासा उतरी
धरतै मारन चुंझां जि’यां ।।
चेतें दी एह् पंड परानी
सांभी दी इक-इक
किश चेते न थपकी आंह्गर
मां दी गोदै झपकी आंह्गर
तर करदे सुक्की धरती गी
मूंह्-मूंह् भरदे मी भुग्गी गी।।
चेते किश लैह्रें नेह् औंदे
सिप्प-मोती गोदा पाई जंदे
किश हाड़ें पर हाड़ बगांदे
जल-थल करियै टुरदे होंदे
बस्सुआं प्ही होंदी ऐ खंडर
झुलदे जेल्लै चेत-बवंडर। ।
हसदे-रोंदे, रोंदे-हसदे
चेतें दे विरसे समल्होंदे
चेते कैसे-कैसे होंदे।
………………………………………….
