ओढनू रंगाना मीं, रंगी दे ललारिया
रीझें कन्नै लाएआं इस्सी, रंग गुला-नारिया
ओढनू रंगाना मीं, रंगी दे ललारिया ।
तंदुएं चा कड्ढेआं ,खंघालियै तूं मैल
लग्गै जेह्ड़ा मनै गी दिक्खने च शैल
कड्ढेआं निखार एहदा, पवेआं नेईं तारिया
रीझें कन्नै लाएआं इस्सी, रंग गुला-नारिया
ओढनू रंगाना मीं, रंगी दे ललारिया ।
मद्धम नेईं पवै बिंद, रंग नेहा लाएआं
ठंडे-ठंडे ब्हाऊ दे, फंडाकें च सकाएआं
मन-चित्त लग्गै जदूं, ब'मां लेई पसारिया
रीझें कन्नै लाएआं इस्सी, रंग गुला-नारिया।।
ओढनू रंगाना मीं, रंगी दे ललारिया ।
करेआं तौल-तौल,मड़ा, जाना बड़ी दूर
सखियें- स्हेलियें दा ऐ टुरी गेदा पूर
लेई ओढनू मीं बी पौना ऐ डोआरिया
रीझें कन्नै लाएआं इस्सी रंग गुला-नारिया
ओढनू रंगाना मीं, रंगी दे ललारिया
रीझें कन्नै लाएआं इस्सी रंग गुला-नारिया।
…………………………………………………………….
