हिरख पनीरी मां-बोल्ली दी मन पैली बिच्च राहेओ
जदूं पनीरी जा मठोई, घर-घर जाइयै लाएओ।
भुल्लेओ नेईं एह् दुनियादारो, करदे र'वेओ हीले
मुहां फबदे मां-बोल्ली दे अक्खर खूब रसीले
इसदा कदें बी गल निं घोटेओ
ञ्याणें गी सखलाएओ
जदूं पनीरी जा मठोई, घर-घर जाइयै लाएओ।
भाशा दी जो कदर करै, ओह्दी अपनी कदर बी पौंदी ऐ
स्कूल-कालजें जदूं पढ़ोऐ, भाशा मती मठोंदी ऐ
बेगौरी निं रेही जाऽ, लोको, इसगी हक दोआएओ।
जदूं पनीरी जा मठोई, घर-घर जाइयै लाएओ।
मिश्री मिट्ठी, सुंढ-पंजीरी भाशा एह् अनमुल्ली ऐ
दुनिया खबरै इसगी ‘किप्पी’ जींदी कि'यां भुल्ली ऐ
भामें भुल्लै अपना आपा, इसगी नेईं भलाएओ
जदूं पनीरी जा मठोई, घर-घर जाइयै लाएओ।
