मीर, गालिब, ज़ौक, अस पढ़दे-सनांदे रेह्
शिव ते जौन ऐलिया, काह्न्नियां जगांदे रेह् ।
अस ते हे सिद्धे, साढ़े मीटर-रदीफ़ पुठ्ठे
सारे बड्डे शायर असेंई, हस्सी समझांदे रेह् ।
जि’नेंगी हा हुनर, उ’नें जिंदगी बसाई लेई
जरमें दे फक्कड़ अस, फेरियां गै लांदे रेह् ।
अदबें, सलीकें कन्नै कदूं जफा निभदी ऐ
अद्धी-अद्धी रातीं उट्ठी, गीत करलांदे रेह् ।
इ’यां गै निं सि’ल्ली होई चन्नै दी एह् चाननी
विरह दे गीत साढ़े अत्थरूं बगांदे रेह् ।
धूफ-बत्ती, पूजा-पाठ असेंई निं भाखा किश
हिरखै दे लोभी अस, उ’ऐ गीत गांदे रेह् ।
भक्खड़े दी जूना हे, केईं झक्खड़ झल्ली गे
बड़, निम्म, चीड़ जित्थें, आकड़ भनांदे रेह् ।
अक्खरें दे गुंझलें च, तत्त कोई लभदा निं
बड्डे शकारी अस, तीर न्हेरें च चलांदे रेह् ।
जेह्ड़े सच्चे आशिक हे, पलें च मुक्की गे
गल्लें दे गझोकड़ अस, गीत गै गांदे रेह् ।
जि’नें रब्ब लोड़चदा हा, चलोभी ओह् लाई गे
अस पढ़ी वेद-गीता, कंढै बेही रम्हांदे रेह् ।
अंदरै दी जोत कदें, साढ़े शा ते बली निं
बाह्र बाली-बाली दिये, देआलियां मनांदे रेह् ।
