मंदरै दे बरांडै लग्गे दे पक्खे ने
ड्योढी लग्गे दे वाटर कूलरै गी पुच्छेआ
भाई, तूं कु’न ते इत्थै कि’यां?
लम्मा साह् लेइयै
परता दित्ता वाटर कूलरै--
मिगी लोआया गेआ इत्थै
शाहें दे जागते दी याद इच
"कुलदीप" दी याद इच।
थेह्-पुट्टू
नासकेतु
घर-कुहाडू़
मौती दे जाता इच
होई गेआ छपन
करदा हा नशे कलैह्ने।
भैनु गी रक्खडी़ दे पैहे देने आह्ला
बेची टकाऽ
फ्ही उस्सै भैनु दियां बालियां
उतरना इन्नी कमीनगी पर
बगैर नशे दे मुमकन नेईं हा।
जिस माऊ कन्नै जुड़े दा होंदा नाडू़
उस मौरी गी
पौड़ियें परा धक्का देने दा जिगरा
बिलाशक
ओचन जिगरे दा गै कम्म ऐ।
एह्दे बब्बै दे सिर नेईं होने इन्ने बाल
जिन्नियें सुक्खनैं-सरीनियैं
द’ऊं कुडि़यें दे दस्सें ब’रें बाद
उ’नेंगी एह् थ्होआ हा ।
साल भर एह्दी दादी
सारी-सारी रात
गांदी बिहाइयां
इक्कली गै।
सभनें दे सिर खेह् पाने आह्ला
बर्णशैंकर
कुलदीप
दीपक
दीआ
नशे दी ब्हाऊ इच हिस्सली गेआ।
