मन करदा फ्ही होंद मिरी पन्छानां में
मेरै अग्गें हर इक मेरी सार धरां।
मेरा होना गै क्या 'होना' काफी नेईं
किश होने लेई की कर तिल-तिल रोज मरां?
अद्धा-पौना किच्चर आखन होना में
की नेई अपना-आप सबूरा अर्ज़ करां
चीरी मेरे अंदर दे सन्नाटे गी
नाड़ी-नाड़ी, धड़कन-धड़कन गीत भरां।
चेता नेईं, पर फ्ही बी किश-किश चेता मी
में मेरे लेई जिस दिन पैदा होआ हा
धरती बी किश झिगड़ी खासी खुब्भी ही
अंबर बी किश उबड़ा होर चकोआ हा
सूरज दी बी हांब मिरे गै पासै ही
चन्न बी मेरी भेठा गै पलमोआ हा
सब नखत्तर होई गे अशकै परिधि पर
कल्ला में गै सब दा मरकज़ होआ हा।
धरती दा विस्तार मिरा गै साया हा
टीह्सी, अंबर मेरे गै हमसाए हे
काम-क्रोध, मोह्-लोभ बी मेरे चाकर हे
गम-पीड़ां, दुःख-दर्द बी अम्मां-जाए हे
बद्दल, बरखा, मौसम, बिजली, झक्खड़ बी
मेरे नैनें सारे कुरजी आए हे
इस चाल्ली सिर-पैर भरोची ब'रेआ में
दिक्खी छल्ल समुंदर दे घबराए हे।
पर में छोड़ी मरकज़ आई ‘आ परिधि पर
मरकज़ पर रौंह्दा तां सब किश मेरा हा
न्हेरा जां फ्ही रात कदूं ही भाखी में
हर भेठा हर पल गै नमां सवेरा हा
ना कुधरै सरहद ही जीवन-साहें दी
ना कुधरै फ्ही मौती दा गै घेरा हा
साह्-साह् मेरा आपूं बेची खाद्धा में
नेईं तां मेरे कोल बी जीन बत्हेरा हा।
मन करदा परतोई जां मेरे मरकज़ पर
होंद मेरी दे दर्शन परती रोज करां।
शब्दें शा की अर्थें तिक्कर दौड़ मिरी
अर्थें शा की गैं नेईं अगड़ी होर भरां
अर्थ 'बगान्ना' इक्क समुंदर करियै में
फ्ही पूरे दा पूरा सागर फुंग करां
मेरा होना गै क्या 'होना' काफी नेईं
किश होने लेई की कर तिल-तिल रोज मरां?
किश होने लेई की कर तिल-तिल रोज मरां?
