चाएं-चाएं नमां सूट सखियो सेआए दा
कैंत मेरा मेरे ताईं जम्मुआ लेआए दा।
टोह्र मेरी बधी गेई रुप गेआ निक्खरी
वाशना शलैपे आह्ली घरै इच बिखरी
दिक्खी मेरा रुप किश चन्न शरमाए दा
कैंत मेरा मेरे ताईं जम्मुआ लेआए दा।
चन्न मेरा आक्खै तेरी टोह्र बनानी ऐ
सांबे थमां देने तुगी झुमके बी आह्नियै
झाँझरां बी आह्न्नी देग उसनै गलाए दा
कैंत मेरा मेरे ताईं जम्मुआ लेआए दा।
उड्डरी दी फिरनी आं बिन्द निं बसोन्नी आं
रंग चौक्खा सूटै दा में दिक्खियै पसोन्नी आं
रुपै दियें रिश्में 'नै घर रुशनाए दा
कैंत मेरा मेरे ताईं जम्मुआ लेआए दा।
———————————————-
