जिस घर बाबुल फडियै औंगल
टुरना मिगी सखाया हा
जिस घर माऊ किन्नी बारी
छातिया कन्नै लाया हा
जिस घर भ़्राऊ कन्नै लड़िये
उस्स गै मिग्गी मनाया हा
जिस घर भैनु कन्नै धूनी
आह्ला किम्ब बनाया हा।
जिस घर कन्धें बी मिगी
स्हारे किन्नें दित्ते हे
जिस घर बूहटे पाइए पींघा
किन्नै झुटे झूटे हे
जिस घर चाचे छपिए पैसे
मेरी तली टकाए हे
जिस घर मामें रोंदे दिक्खी
रोंदे रोंदे आए हे
जिस घर मासी
माऊ लेखा सारे
फर्ज नभाए हे
जिस घर नानी दादी ने
किन्नै चाज्झ सखाए हे
जिस घर बुआ बड्डी भैनु
साहीं साथ नभाए हे
ओह् घर कीता देस बगाना
देस नकाले दित्ते है
सोह्रे घर गै अपने न कुडियों
पिच्छुयां आले दित्ते हे।
अगलें दे घर पुज्जिए सुनेआ
एह् कुड़ी बगाने घर दी ऐ
दिक्खो कि’यां कटदी इत्थै
दिक्खो केह् किश करदी ऐ
परसो-परसा होई जन्नी अं'ऊं
सारें दे मन पाने गी
केह् बड्डे केह् निक्के इत्थै
इरखें लानी ञ्याने बी।
मासा हारी गलती होई जा
शैह्र टंडोरा फिरी जंदा
माऊ बब्बै दी सुनिए निंदेआ
मेरा रुह भलखोई जंदा
कोई इत्थै लाड़ निं लान्दा
कोई अत्थरूं दिक्खदा नेईं
कोई सिरे र हत्थ निं फेरै
कोई हिरखें मिलदा नेई
गल्लां कौड़ कसैली
जैह्री सुनी-सुनी
कन्न पक्की गे
अत्थरूं रोकी रोन छपैली
जींदे-जींदे हक्की गे।
जम्मियै जिं’दे रौनकां लाइयां
ओह् घर बाबुल दा अड़ेयो
ब्योहियै जिं’दे सज्जियै आइयां
ओह् घर सोह्रियें दा अड़ेयो
अं’ऊं केह्ड़े घरा दा माह्नू
जेह्ड़ा मेरा अपना है
अग्गीं बलियै जित्थै जाना
ओह् घर हरी दा घर अड़ेयो
बेई डोआठन पेई सोचें
सीता गी ते धरती थ्होई
तेरे गित्ते लाट चिखें दी
उन्न उ’यै तेरा घर मोई।
———————————-
