जल कण

निर्मल नेही रफ्तार
सोआतम उत्तम नदियें दा
सागर नै मिलने दा अनथक उद्धम नदियें दा  
नत्त मस्तक हर शैह् ऐ इं’दी अलमस्ती दे अग्गै।

एह् निं बिसरन पूर्ण समर्पण खडमस्ती दे अग्गै 
लिस्सी भाऐ भरी-भरोची, बस्स बगदे गै जाना
गति दे लड़ लग्गी दी इस नै अपना धर्म नभाना
जीवन दर्शन गैह्रा ते एह् सूक्ष्म नादियें दा। 

देह् अंदर दे जल कण बी, जदूं होइयै नदियां बगदे 
उद्धम हीले करदे होई सभनें दा चित्त हरदे 
लेतर खेतर बत्तर करदे नदियां करदियां जि’यां 
भर-उत्साह ब’न्नै लांदे, दुख कसाले उ’आं। 
————————————————