सच्च पुच्छो तां न्यारी लगदी
पीड़ मी अत्त प्यारी लगदी
अक्खीं गी एह् सागर करदी
त्रिप-त्रिप मोती गोदै भरदी
फ्ही आपूं इक सूत्तर बनियै
खिल्लरे मोती आप कठेरै
उंʼदे कन्नै मिगी बडेरै
रगड़ी-धोई नमां बनांदी
जीने दी इक आस जगांदी
सच्च पुच्छो तां न्यारी लगदी
पीड़ मी अत्त प्यारी लगदी ।
लहुऐ दे इक-इक तोप्पे इच्च
हड्डियें अंदर इʼयै बसदी
अंदरो-अंदरी कुरजी औंदी
पीड़ें आह्ले बीऽ पौंगरदे
बधी-उस्सरी, फ्ही ओह् इक दिन
शैल-झौंगरा, बूह्टा होंदे
पीड़ें आह्लें इस बूह्टे पर
भावें आह्ले गुत्थ मठोंदे
किर-किर करदे भाव पुड़छियै
थां-थां में बनकाई लैन्नीं
कविता इक सजाई लैन्नीं
सच्च पुच्छो तां न्यारी लगदी
पीड़ मी अत्त प्यारी लगदी ।
सोचो, जेकर पीड़ नेईं होंदी
कुʼन होंदा जरनीक, नमाना
खुशियें दी कोई कदर नेईं होंदी
गज़लै दे मिसरे नेईं होंदे
अक्खीं सोके पेदे रौंह्दे
हास्सें दी कोई रौंस नेईं होंदी
आस्सें दी बी थौह् नेईं होंदी
सच्च पुच्छो तां न्यारी लगदी
पीड़ मी अत्त प्यारी लगदी।
डरनीं, जेकर मुक्की जाङन
पीड़ां जेकर चुक्की जाङन
खालम-खाल्ली होई जाना में
कुस दी र्होली फ्ही जीना में
इक परात पीड़ें नै भरियै
खट्टी, शैल पलेटी दी में
अंदरें कोठी सांभी दी में ।
सच्च पुच्छो तां न्यारी लगदी
पीड़ मी अत्त प्यारी लगदी ।
————————————-
