एह् भाव मनै दे कदें छप्पी निं सके
ना गै दुनिया कशा
ते ना गै अपने आपै कशा।
एह् चुपचाप अक्खियें च आई बौंह्दे न
बनी गासे आह्ले बद्दलू
ते लेई जंदे न रुढाई मनै दा भार
एह् दुख-सुख दियां सारियां
सरहदां टपदे दिशाहीन
होई बी कुतै निं थमदे
ते लंघी लैंदे हिरखै दियां कन्धा।
कदें जज़्बात आह्ले रंगे च रंगोई
काकलें दे उप्पर डुल्ली जंदे न
ओह् समझदे न भाशा खमोशी दी
ते तां गै ताउम्र कन्ने चलदे रौंह्दे
लेइयै ज़िंदगी दा सारा तर्जुबा
कदें सुआलें दे जवाबें दी खेचल च
अक्खियें दी डूंगी डब्बरी च
चुपचाप खप्पी जंदे न।
—————————
