बड़ा औखा रौह्ना माए, सांबे दियां कंढ़िया
त्रुट्टी जंदा लक्क मोया चढ़ी- चढ़ी ढक्कियां
पानिये दी थ्होड़ माए, खूह् बड़ा दूर ऐ
जिंद मेरी हुट्टी गेई, होई चूर-चूर ऐ
सस्स ताने मारदी, ननान केह्ड़ी घट्ट ऐ
शकारे दा शकीन, निक्का देर परगट्ट ऐ
पूरा-पूरा दिन रौंह्दा, गोत्री प मंडिया
बड़ा औखा रौह्ना माए, सांबे दियां कंढ़िया।
आई जंदा सोहा माये, जिंद मेरी सैह्कदी
अंबे बूर पेई जंदे, कोयल कुते चैह्कदी
ब्हाउ दा फनाका माये, बिंद नेइयों झुलदा
खड्डें, टिब्बें, जाड़ें दा बी लूं-लूं तपदा
मरै ओह् रवारा जेह्का, इत्थें मी त्रंडिया
बड़ा औखा रौह्ना माए, सांबे दियां कंढ़िया।
कीकरें ते बैरें कन्नें, जान निं पछान ऐ
हर कोई अपना ऐ, फ्ही बी अंजान ऐ
कुते सप्प, बिच्चू कुते, फलींगर गनाह् ऐ
रातां बियाबान माये, सुक्की जंदा साह् ऐ
इ’यै रौंह्दा डर कोई, कीड़ा गै निं डंगिया
बड़ा औखा रौह्ना माए, सांबे दियां कंढ़िया।
देसै दा सपाही सोह्ना, गबरू जोआन ऐ
कैंत परदेसी मेरी आन-बान-शान ऐ
चित्त निं लगदा माये, इसी समझाई लैनी
हुन माये सांबा गै, मेरी जिंद जान ऐ
स्हेलियें दा पूर माये, दूर कुते खिंडिया
बड़ा औखा रौह्ना माए, सांबे दियां कंढ़िया।
———————————
