सौक्खे साहें जीना जेकर रुक्ख बचाने पौने न
बचना जे तबाही कोलां होर बी लाने पौने न।
रुंड-मरुंडा बेह्ड़ा करियै चिप्स मार्बल पाया ऐ
टौह्र बनाई बेह्ड़े दी पर बूह्टा इक निं लाया ऐ
धरती गै निं किश ते अपनै चारै लाने पौने न
सौक्खे साहें जीना जेकर रुक्ख बचाने पौने न।
गर्मी-सर्दी कोला बचाई इयै बदल बरहांदे न
शैल-सन्हाके रुक्खें गी पर बड्ढी लोक टकांदे न
सैल्ले एह् दरवेश फ्ही सारें धरत सजाने पौने न
सौक्खे साहें जीना जेकर रुक्ख बचाने पौने न।
बूह्टे जेकर लागे नेईं तां औख बड़ी गै होनी ऐ।
आक्सीजन दे फड़ी सलंडर किच्चर जिन्दगी ढोनी ऐ।
जीने ताईं दोहारे 'किप्पी' साह् नोआने पौने न
सौक्खे साहें जीना जेकर रुक्ख बचाने पौने न।
———————————————-
