काले घने बदलें गी दिखियै
इ'यां बझोआ 'रदा हा
अश्कें उ’नें रेस ही लाई दी
गासा उप्पर इक दुए ने
मल्लो -मल्ली,
छड़को -छड़की लाई दी ही उ’नें
गज्जो-गज्जी,
मिल्को-मिल्की कन्नै डराइयै
अश्कें
इक दुए शा पैह्लैं ब’रने दी
पैह्ल करा दे होन
बरसी-बरसी इ’नें धरती अत्त सजाई दी ही
अश्कें नमीं ब्याह्ता ने सैल्ला चोला पाए दा होए।
मिट्टी-घट्टा पत्तरें'र बिंद नेईं हा रेह्दा
रुक्ख-बुह्टे न्होई-न्होई रज्जे दे खिड़ी-खिड़ी पवा दे हे
फुल्लें भरी क्यारियें भौंरें रौनक लाई दी ही
नदियें, नालें, तलाऽ, तलाईंयें
यौवन ठाठां मारा 'रदा हा
लगी दी ही बरसांती दी झड़ी
चपासम नूर आए दा हा।
_____________________
