जात, मूंह्, जीह्भ, ओठ, दंद
सब चिरें दे गुआची गेदे न
बस छड़ा चीको-रौला ऐ
शब्दें दी अर्थहीन भीड़ दा
सारे अर्थ इं'दे शा
तदूं खुस्सी लैते गे हे
जदूं एह्
अपनी होंद बचाने गित्तै नस्सा करदे हे
की जे
पूरे मुलखै च भान पेदी ही
फ्ही एह् सारे अर्थ
दफनाई दित्ते गे हे
मुलखें दी सरहदें पर
अर्थ डरे-सैह्मे दे रोंदे नेईं
पर डुसकदे न
मिगी जेकर
कुसै अर्थ दी डुसकन सनोचै
तां में पैन्न-कॉपी लेई
उस बक्खी दौड़नां
पर मेरे पुज्जने शा पैह्लें गै
डुसकन चुप्प कराई दित्ती जंदी ऐ
ते में परतोई औन्नां सक्खना गै
बिजन कोई कविता कीते
बगैर कोई शेऽर आखे।
———————————-
