गिने-चुने होन तां में करां गुणगान
केह् संस्था दे गिनियै गनांऽ योगदान।
होर साहित्य कनेहा फ्ही होना ऐ
छूई लैता हर इक विधा दा कोना ऐ
सिरजन साहित्य दी ते गल्ल गै निं कक्ख
भाशा दे खेतरै च बी एह् सवा लक्ख
आलोचना साहित्य बिच बेमिसाल ऐ
काव्य शास्त्र बिच बी कीता कमाल ऐ
विद्वानें कन्नै म्हेशां रेही एह्दी झत्त ऐ
तां गै फ्ही पद्धरी अज्ज एह्दी बत्त ऐ
भाशाएं च डोगरी तां गै प्रधान
केह् संस्था दे गिनियै गनांऽ योगदान ।
भाशा ते साहित्य दा कीता प्रचार
करियै फ्ही इसने मशैह्रे थाह्र-थाह्र
इस चाल्ली करी- करी इसने साधना
बाह्र कड्ढी लोकें चा इन्नै हीन भावना
करियै प्रचार रक्खी इन्नै बचाइयै
संस्कृति डुग्गर फ्ही आपूं अपनाइयै
लोकें च चेतना मड़ो फ्ही जगाई ऐ
निरंतर नमीं चेतना इन्नै छपोआइयै
दिन-रात इक्क कीती लाई जिंद जान
केह् संस्था दे गिनियै गनांऽ योगदान।
सम'ग्गरी कठेरी इन्नै थां-थां जाइयै
जोगियें शा कारकां बारां गुआइयै
खोज करी-करियै गाथां गुहाड़ियां
डुग्गर दे लोक नायकें दियां सारियां
लोकप्रिय जम्मू दी लखारी शख्सियतां
पोथी छपोआई दिक्खियै खासीयतां
सम्मेलन मशैह्रे आयोजन कराइयै
डुग्गर-विरासत इन्नै रक्खी बचाइयै
भवन एह्दे कम्में दा ऐ जिंदा प्रमाण
केह् संस्था दे गिनियै गनांऽ योगदान।
डोगरी लखारी अज्ज कुत्थै निं लब्भै दे
बैंक-कलंडरें चित्तर इंदे फब्बै दे
पुज्जी ऐ शमान भाशा हून निं हेठ ऐ
होऐ दी तां गै गुग्गल ट्रांसलेट ऐ
अठमें शड्यूलै दा बी जदूं हा दौर
उसलै बी संस्था दा हा कम्म सिरमौर
डोगरी डिपार्टमेंट कदें बी खड़ोंदा निं
संस्था दा कदें मड़ो दखल जे होंदा निं
जानदे न सारे केह् देना प्रमाण
केह् संस्था दे गिनियै गनांऽ योगदान।
डुग्गर संस्कृति छड़ी रक्खी निं बचाइयै
कालजें-स्कूलें बिच बी चलोआई ऐ
थां-थां थाह्र दुआएआ थां-थां जाइयै
औख लग्गी जित्थै उत्थै मुहिम चलाई ऐ
सन चरताली थमां अज्जै तोड़ी ब्हाल ऐ
पंदरां रोजा गोश्ठी इसदी मसाल ऐ
निर्माण कम्में दा ते त्रोड़ेआ रिकार्ड ऐ
पैह्ला प्रधानता च लब्भा अपवाद ऐ
नक्शा यारो भवन दा चढ़ै दा शमान
केह् संस्था दे गिनियै गनांऽ योगदान।
मुंढले लखारियें भाशा फलाई ही
सोच नमें कवियें दे जैह्न च पाई ही
डोगरें चा डोगरे शेर हे ओह् खास
पाई गे जो डोगरी संस्था दी घास
अज्ज बी निं संस्था दे सदस्य यारो घट्ट
इ'नें बी नीं सज्जनो छड्डे दा ऐ हठ
उत्तराधिकारी यारो घट्ट कि'यां होन
सारे लोक एह् मिशनरी चुप कि'यां बौह्न
तां गै सारे चढ़े न फ्ही कम्म परवान
केह् संस्था दे गिनियै गनांऽ योगदान।
ढौंदी लोक संस्कृति इन्नै खडेरी ऐ
पोथियें च लोक गीत इन्नै कठेरियै
इन्नै मुड़ी लोकें गी याद कराया ऐ
रेडुएं-स्पीकरें च इ'नें ई बजाया ऐ
ब्याहें-कारजें बिच ब्हार बदलोई ऐ
डोगरा लिबास ते पग्ग परतोई ऐ
वरदान डोगरें तै संस्था होई ऐ
मुड़ी गुआची दी संस्कृति थ्होई ऐ
डोगरें गी अपने नै होई पंछान
केह् संस्था दे गिनियै गनांऽ योगदान।
लगी परतोन संस्कृति हौली-हौली ऐ
मुड़ी लगी लब्भन ब्याहें बिच डोली ऐ
बशक्क दर्शांदे न भां झलक गै मात्तर
वीडियो रील ओह् बनाने दी गै खातर
ब्याहें च डोगरा खान-पान लब्भै दा
कुर्ता-पजामा बी चूड़ीदार फब्बै दा
ऐह्में बदलाऽ दा निं बनी आ ढंग ऐ
संस्था दी अनथक मेह्नत दा रंग ऐ
इस्सै चाल्ली संस्था दी बनी ऐ पंछांन
केह् संस्था दे गिनियै गनांऽ योगदान।
बझोंदी एह् डोगरें दी प्रतीक ऐ
संतुलत हर संस्था दा कम्म सटीक ऐ
मूहां जदूं डोगरी संस्था बलोंदी ऐ
डुग्गर संस्कृति सामनै खड़ोंदी ऐ
कुसै बी सभा दा जदूं नेहा बजूद
अदूं बी ही डोगरी संस्था मौजूद
संस्था लग्गै जामबंत जि'यां लेटे दा
बड़ा लम्मा-चौड़ा इतिहास समेटे दा
निहा अदूं कुसै बी सभा दा नांऽ-नशान
केह् संस्था दे गिनियै गनांऽ योगदान।
बेशक जतनें बाद एह् कुतै उज्जी ऐ
सदियें तोड़ी रौह्ग नेह् थाह्र पुज्जी ऐ
संस्था ने नमीं तकनीक नै जोड़ेआ
नैट च करी सैट एह्दा नक्का मोड़ेआ
पुज्जी गेई ऐ उप्परलियें ब्हाएं च
आइआ नांऽ एह्दा बी खास नाएं च
भविक्ख बिच डोगरी बेशक नीं बलोग
फ्ही बी यारो भाशा सुरक्खत गै रौह्ग
हुन नीं ऐ लोड़ होने दी परेशान
केह् संस्था दे गिनियै गनांऽ योगदान।
भाशा शा भाशी भां दूर होई जाह्ग
कदें ते इतिहास अपना-आप दर्हाग
सुर जदूं पिछली पीढ़ी दा माह्नू लाह्ग
सम्पर्क त्रुट्टे दा फ्ही झट जुड़ी जाह्ग
नमां बंदा जदूं कुसै लफ्जै पर फस्सग
झट नेट उसी ओह्दा मतलब दस्सग
कम्प्यूटर दे कम्मै च, निं इत्थै होर बंदा ऐ
शशि पठानिया, होरें गी श्रेय जंदा ऐ
केह्ड़ा-केह्ड़ा होर में करां गुणगान
केह् संस्था दे गिनियै गनांऽ योगदान।
कुदरत दा कैह्र मड़ो जदूं हा ढट्ठेआ
करोना च अपना बी हा दूर नट्ठेआ
माह्नू हा मिलने-मलाने गी कम्बेआ
अदूं बी आन लाइन इन्नै कम्म रंभेआ
पंदरां रोजा गोश्ठी रेही गति शील
क्हानियें दी बी चलदी ही बिच-बिच रीह्ल
चेचे मशैह्रे बी बिच-बिच होंदे रेह्
पेपर बी बिच कदें कालें पढ़ोंदे रेह्
सब किश ऐ अजै बी उ'आं गै गतिमान
केह् संस्था दे गिनियै गनांऽ योगदान।
——————————
