गीत

चाएं-चाएं नमां सूट सखियो सेआए दा
कैन्त मेरा मेरे ताईं जम्मूआ लेआए दा।

चन्न मेरा आक्खै तेरी टोह्र बधानी ऐ
सांबे थमां देने तुगी झुमके बी आनी ऐ
झांजरां बी आनी देग उसनै गलाए दा
चाएं-चाएं नमां सूट सखियो सेआए दा।

टोह्र मेरी बधी गेई रूप गेआ निखरी
वाशना शलैपे आह्ली घरै इच बिखरी
दिक्खी मेरा रूप किश चन्न शरमाए दा
चाएं-चाएं नमां सूट सखियो सेआए दा।

उड्डरी दी फिरनी आं बिन्द निं बसोन्नी आं
रंग चौखा सूटै दा में दिक्खियै पसोन्नी आं
रूपै दियें रिश्में नै घर रुशनाए दा
चाएं-चाएं नमां सूट सखियो सेआए दा।
——————————