सैल्ले परवत दब्बड़-जाड
करदी बरखा दी हर धार
छर-छर बगदे नदियें नालें
कीता धरती दा शंगार
रौनक लग्गी थाह्रो -थाह्र
आई ऐ बरखा आह्ली ब्हार।
निमते होई गे रुक्ख ते बूह्टे
बेलें पर फुल्ल खंदे झूटे
छैह्-छैह् मिट्ठे नाड़ू बगदे
डाह्डी मस्ती मनै च भरदे
त'वी बझोंदी प्रेम दीवानी
अशकै अल्लढ़-जन मुटेयार
रौनक लग्गी थाह्रो थाह्र
आई ऐ बरखा आह्ली ब्हार।
लैह्री-लैह्री बरखा बरदी
खेत्तर-खुम्बे सुच्चे करदी
इक-इक पत्तर चुमदा गास
बूँदें भरिये हिरख सगात
जि’यां अम्मा हिक्कड़ू लाइयै
करदी बच्चड़ुयें गी प्यार
रौनक लग्गी थाह्रो थाह्र
आई ऐ बरखा आह्ली ब्हार।
इक-इक बूंद सलक्खनी आई
सभनें दे मन आस जगाई
सज्जी नारां थाल सजान
भांत-सभांते दे पकवान
रसदा-बसदा रवै एह् म्हेशा
साढ़ा सुख भरेआ संसार
रौनक लग्गी थाह्रो थाह्र
आई ऐ बरखा आह्ली ब्हार।
——————————-
