लोs

पुन्नेआ दी लोई च
जिसलै में अक्खीं मीटियां
ते मेरे अंदरें कविता
ने अक्खीं गुहाडियां
झमाणी मारी ते बुहास्सरी
सनाs..... की नेईं
आ’ऊं बी....
चन्नै साहीं होई जां
सारा जग्ग चानन-चानन
होई जाह्‌ग!

आ’ऊं अंदरो-अंदरी
हस्सी पेई
ते परता दित्ता
जे तेरी ते चन्नै दी
केह् बरोबरी??
ओह् इक्कै थाह्‌रा र बैठा
सभनें गी अपनी लोई दी
बुक्कलै च सांभी लैंदा
चन्न ईश्वर दी ओह् देन ऐ
इस स्रिशटी गी
जेह्‌ड़ा न्हेरियें रातीं
लोकें गी सेही राह् पांदा ऐ
ओह्‌दे नै तेरियां केह् रीसां?
 
मेरे अंदरें कविता
खिड़-खिड़ हस्सी पेई
ते बल्लै जेही कुसकी--
सुन ! मेरा ईश्वर ते तूं ऐं
तूं मिगी घड़
मिगी अक्खरें च ब’न्न
इस जोग बनाs
जे आं’ऊ इस संसारै इच
बसदे दिलें गी
रोशन करां ते
सेही राहें पां ।

इस विशाल जग्गै च
मिगी उस
लौह्‌के माह्‌नुए साहीं बनाs
जि’दे हत्थ लम्मे ते
पैर लौह्‌के होन
की जे
लम्मे हत्थें मते हारे
लोकें गी प्रेम दी बुक्कली च लेई लैना
ते लौह्‌के पैरें सभनें कोल
समां रौंह्‌दे पुज्जी जाना
आ’ऊं बी पुज्जी जाङ।

में सुने दा ऐ जे
बड्डे माह्‌नू दे लम्मे पैरें गी
छडापियां मारने दी खोह् होंदी
ग्रां, शैह्‌र ते देश
नापने दे चसके होंदे न
ओह् निक्कें पासै नेईं दिखदे
मिगी बड्डे शैह्‌रे दे
लौह्‌के माह्‌नुए साहीं बनाs
लोs चन्नै दी फुल्लें-फलें च
रस गै रस बनाs
तूं कविता देही घड़ेआं
जेह्‌ड़ी मनें च हिरख जगाs।