सिरे प्हाड़--
कुदरत दे अजूबे—
प्हाड़
कुदरत दे करिश्में—
प्हाड़
प्हाड़ें दे राजसी ठाठ-बाठ दे
किस्से-क्हानियां अनंत
सोहा होऐ जां स्याल
भां होऐ बसंत
प्हाड़ें दा शलैपा अद्भुत
करदा हर कुसै गी चंभत ।
प्हाड़ अटल-अडिग
प्हाड़ें दे शलैपे दे जिकर बिजन
साहित्य ते कला बी गूंढी-बुच्ची
प्हाड़ अलंकार
प्हाड़ प्रतीक ।
पर उ’ऐ प्हाड़ होंदे न—
अटल ते अडिग
जिं’दे सिरै पर होंदी ऐ छत्र-छाया
नंग-सिरे प्हाड़ें दी निं कोई पाया
नंगे सिरें आह्ले प्हाड़ में उडदे दिक्खे न
मिट्टी दे प्हाड़ मिट्टी च रलदे दिक्खे न
डुआरी लेई जंदियां न ब्हामां
जिं’दे सिरै पर नेईं होंदियां छामां ।
