करै दी वादे
मेरे कन्नै लक्खां
एह् स’ञ बी कैसी
फरेबन कोई ऐ,
नां साथ दिंदी
नां साथ छुड़दी
एह् चंदरी बी कैसी
साथन कोई ऐ।
मेरे कंबदे हत्थैं
गलासू थम्हांदी
मिगी रोज अक्सर
हसांदी-रोआंदी
तनै च बला दी
मनै च पला दी
एह् औतर बी कैसी
वेद्दन कोई ऐ।
बड़े हादसे नै
शंगारी चली ऐ
छड़ी पीड़ बत्ता
खलारी चली ऐ
नां कूंदी-बलांदी
नां कोई गल्ल सनांदी
एह् जोगन बी कैसी
बजोगन कोई ।
बड़े बल्लें-बल्लें
मेरे कोल आई
मेरे सुर्ख ओठें’र
औंगल टकाई
मेरी र्होल बनदी
मेरी जौल बनदी
बझोंदा मी अश्कै, मेरी
करीबन कोई ऐ।
गलाबी-शराबी
सूरज दे साहीं
मिगी रोज अपनी
गोदा बठाई
जदूं प्यार करदी
मेरी पीड़ हरदी
मैह्रम मी इ’यां
बझोंदी फ्ही जि’यां
मेरे साकिया दी, एह्
साकन कोई ऐ
नां साथ दिंदी
नां साथ छुड़दी
एह् चंदरी बी कैसी
साथन कोई ऐ ।
