मरदे-मरदे बच्चे दा फ्ही जिसगी ख्याल ऐ
रिश्ता यारो मां दा एह् बड़ा गै कमाल ऐ ।
बच्चें पिच्छै मरी-मरी जीवन जो जींदी ऐ
बच्चें पिच्छै जेह्ड़ी सदा खंदी ते पींदी ऐ ।
सेह्तमंद बच्चा जे , मां सभनें शा मीर ऐ
बच्चा गै रूह् ऐ ओह्दी आपूं मां शरीर ऐ ।
जो कट्टै फटे हाल च बी सोहा ते स्याल ऐ
रिश्ता यारो मां दा एह् बड़ा गै कमाल ऐ ।
अपने जीने दी बिंद उसगी नेईं खिच्च ऐ
अपना ते आप ओह्दा रौंहदा बच्चे बिच ऐ ।
बच्चा यारो ओह्दा कदें जेकर खुशहाल ऐ
समझी लैओ मां फ्ही म्हेशा मालामाल ऐ ।
बच्चे गी खुश दिक्खी होई जंदी निहाल ऐ
रिश्ता यारो मां दा एह् बड़ा गै कमाल ऐ ।
जीवन ऐ मां दा यारो ममता च टकोए दा
अमरता दा जिस गी ऐ वरदान थ्होए दा ।
जुर्रत निं मौती दी ममता गी मकाई जा
देहु गी बेशक पलें - खिनें बिच ढाई जा ।
ममता कश पुज्जी जा एह्दी केह् मजाल ऐ
रिश्ता यारो मां दा एह् बड़ा गै कमाल ऐ ।
जीने - मरने दी परवाह् नेईं इसी बिंद ऐ
दिनै-रातीं रौंह्दी एह्दी बच्चें बिच जिंद ऐ ।
रज्जी खंदा बच्चा सुख मां लेई जंदी ऐ
थुड़ी जा जे रुट्टी मां भुक्खी सेई जंदी ऐ ।
दुख ऐ मां दा संगी-साथी जिगरी भ्याल ऐ
रिश्ता यारो मां दा एह् बड़ा गै कमाल ऐ ।
लड़ी सकदा माऊ नै निं ,किन्ना बी साह्न ऐ
ओह् देई सकदी बच्चें पिच्छै जिंद ते जान ऐ ।
कुसै किस्मै दी तंगी बच्चे गी लगदी होन ऐ
तां जिंद मां दी कुदरती गै लगदी खचोन ऐ ।
कुदरती कनैक्शन वायरलैस बाकमाल ऐ
रिश्ता यारो मां दा एह् बड़ा गै कमाल ऐ ।
मरदे बी निं आखै जे बमार में इन्नी आं
चाह् मंगै बच्चा जे आखै बनाई दिन्नी आं ।
प्रले च बी ममता दा दीआ कि'यां स्हिली जा
कुदरत दा केंदर बेशक भाएं हिल्ली जा ।
रब्ब बी निं होई सकदा इन्ना देआल ऐ
रिश्ता यारो मां दा एह् बड़ा गै कमाल ऐ ।
खबरै किन्नी ममता माऊ दे बिच होंदी ऐ
मरने दी चिंता छोड़ी बच्चें च खचोंदी ऐ ।
अनसम्भ कोरज आह्ली ममता दी बांऽ ऐ
बोह्ड़ी शा बी मती घनी ठंडी छांऽ मां ऐ ।
रेही - रेही रब्ब गी बी औंदा ख्याल ऐ
रिश्ता यारो मां दा एह् बड़ा गै कमाल ऐ ।
रब्ब दा मां रूप साख्यात निं कोई होर ऐ
केइयें गल्लें रब्ब शा बझोंदा सिरमौर ऐ ।
बख्शी सकदा जान रब्ब तां गै ओह् म्हान ऐ
मां ते यारो बच्चे पिच्छै देई सकदी जान ऐ ।
घड़ी-मुड़ी मनै च इ'यै उठदा फ्ही सुआल ऐ
रिश्ता यारो मां दा एह् बड़ा गै कमाल ऐ ।
