स’ञां दे परछामे कोला नस्सी डरना किन्ने चिर
सोचैं पाली भै न्हेरें दा, कण-कण मरना किन्ने चिर !
की नेईं तुप्पी लैचै कारी, फट्ट भलेरी राम देऐ जो
अल्ले घाएं लून सटाइयै पीड़ें इ जरना किन्ने चिर !
भौड़े नै भिड़ने दा कोइ चेचा कड्ढने पौना तोड़
कागज़ दी इस देह् किश्ती ने आखर तरना किन्ने चिर!
रुड़ी निं जायां निक्के हाड़ैं हाठ दनां किश उच्चा कर
अजें पता निं इस बदली नै त्रुट्टी ब’रना किन्ने चिर ?
मेरा बातन पुच्छा करदा मेरे भोले दाएं गी
नेड़ सफलता कन्नै करियै इ’यां हरना किन्ने चिर!
चाढ़ दनां मुस्कान दा सूरज, डिग्गल गम दे छट्टन किश
शैह्र मेरे दी इन अक्खीं नै छमछम ब’रना किन्ने चिर!
इक दिन करनै पौना निश्चा औखें कन्नै लड़नै ताइं
झूठी आसें, फिक्की सद्दरें मनें इ भरना किन्नै चिर!
बत्तें अक्खीं पत्थर होइयां, कोई सनेहा आवै उ’दा
इंतजा़र में उसदा "अम्बर" होर बी करना किन्ने चिर?.
