गज़ल

आपूं न्हेरै-न्हेरै, लोऽ असेंगी दस्सन
आपूं दब्बड-दब्बड, चोऽ असेंगी दस्सन ।

ठ्होरन सिनकूं साहीं नीहां साढ़ियां
कराई टक्क-टक्क, ठोऽ असेंगी दस्सन ।

आपूं पालन कांऽ, कबूतर ते तोते
साढ़ी बारी लोको, डोऽ असेंगी दस्सन ।

नबेडन कम्म, बनी जीवली गुली
पर परते च, रोह् असेंगी दस्सन ।

खाई मलाइयां मारदे न डकार
पर साढ़ी बारिया, भोऽ असेंगी दस्सन ।

म्हीने सौन दियां लुट्टी मौजां आपूं
सुक्का, चुप-चपीता पोह् असेंगी दस्सन ।