मौत तेरी औंगल गी फड़ियै
इस दुनिया गी छोड़ी
इक नमीं दुनिया बिच्च
डरदे-झकदे पैर जदूं में रखगा, चलगा
दस्स, तेरे नै केह् गल्ल करगा !
मी जीवन दे बिजन
कोई बी गल्ल निं औनी
ते जीवन दी गल्ल तेरी समझा निं औनी
फ्ही कि’यां तेरे साथें ओह् पैंडा कटगा
दस्स, तेरे नै केह् गल्ल करगा !
बच्चे गी खिड़दे दिक्खी
माऊ दा मन खिड़दा ऐ किं’यां
कि’यां दसगा
दस्स, एह् उडदा पंछी दिक्खी
बच्चे दा मन उडदा ऐ कि’यां
कि’यां दस्सगा
भाव मनै दे लिखने ताईं
हत्थ कवि दा चलदा कि’यां
कि’यां दसगा
कदें-कदें फुल्लें गी तज्जी
माह्नू कंडें की चुनदा ऐ
कि’यां दसगा
नां खूनै दे, नां दुद्धै दे
नाते-रिश्ते की छुड़दे ओ
कि’यां दसगा
तूं न्हेरा
में किरण लोई दी
में जिंदा आं
तूं मोई दी
मेरी कोई गल्ल तेरी समझा निं औनी
तेरी कोई गल्ल मेरी समझा निं औनी
फ्ही कि’यां तेरे साथें ओह् पैंडा कटगा
दस्स, तेरे नै केह् गल्ल करगा !
