असें कत्तै पौंदी भान
सुकदी रौंह्दी साढ़ी जान
कैसा खेढ रचाए दा
कुसने बाडर बनाए दा?
सुलह-सलाही चलचै सारे, की ऐ झगड़ा पाए दा?
पीड़ बंडाई, लाड़ लड़ाचै, की ऐ झगड़ा पाए दा?
भांडे-थालियां बिच्च टोकरें
कपड़े सदूंखैं, रुट्टी गागरें
डंगर-बच्छा हक्की-हक्की
शैह्रें पासै नसदे जान
अपने पराए दी नेईं पन्छान
हाए ओ रब्बा पेई ऐ भान
जीना नरक बनाए दा
कुसने बाडर बनाए दा?
सुलह-सलाही चलचै सारे, की ऐ झगड़ा पाए दा?
पीड़ बंडाई, लाड़ लड़ाचै, की ऐ झगड़ा पाए दा?
इद्धरै आह्लें मोर्टार चलाई
उं’दा दित्ता टैंक डोआई
दिक्ख गोली उद्धरां बी आई
दित्ता जवाब उ’नें भी भाई
सीस-फैर फ्ही दित्ता कराई
ईद-देआली खरी मनाई
रिफ़्यूजी कैंप लोआए दा
कुसने बाडर बनाए दा?
सुलह-सलाही चलचै सारे, की ऐ झगड़ा पाए दा?
पीड़ बंडाई, लाड़ लड़ाचै, की ऐ झगड़ा पाए दा?
रढ़ी जाऽ तां बड्ढन निं दिंदे
बड्ढी लैओ तां कड्ढन निं दिंदे
डंगर-बच्छा चुगन निं दिंदे
सुखने साढ़े पुग्गन निं दिंदे
की ऐ बाडर बनाए दा?
कुसने बाडर बनाए दा?
सुलह-सलाही चलचै सारे, की ऐ झगड़ा पाए दा?
पीड़ बंडाई, लाड़ लड़ाचै, की ऐ झगड़ा पाए दा?
औन जो पैह्लें ओह् पैह्लें जान
अनपढ़ें गी मास्टर लोआन
पढ़े-लिखें शा हल्लां बोहान
लिखी-पढ़ियै अनपढ़ खोआन
‘यश’ शा एह् गीत लिखाए दा
कुसने बाडर बनाए दा?
सुलह-सलाही चलचै सारे, की ऐ झगड़ा पाए दा?
पीड़ बंडाई, लाड़ लड़ाचै, की ऐ झगड़ा पाए दा?
…………………………
