केह् ऐ मेरी कविता…

केह् ऐ मेरी कविता –

केह् ऐ मेरी कविता?
की में लिखनां कविता?

कविता राहें 
चुननां टोटे उस कविता दे
जो में हा
तुस हे
अस सब हे
ते पुच्छनां जे
ओह् कविता की भज्जी-खिल्लरी
बस, इ’यै किश करदा रौह्‌न्नां।

इत्थै-उत्थै खिल्लरे दे टोटें गी
चुनदा-सलदा रौह्‌न्नां
डींगे-त्रेह्‌डे टोटें गी
इत्थै-उत्थै बनकांदा रौह्‌न्नां।

जिस दिन थ्होई जाने 
ओह् सारे टोटे
ते
अपनी-अपनी थाह्‌र जदूं टोटें गी थ्होनी
लोड़ तदूं कविता लिखने दी
मी निं पौनी
की जे
कविता नेईं लिखदी कविता गी ।