कोई तार मनै दे ल्हाई गेआ
मनै सुत्ती दी प्रीत जगाई गेआ
अक्खियें चा नींदरां उड्डी गेइयां
मिगी अपनी जोगन बनाई गेआ ।
सुर-ताल साढ़ै मनै उज्जन लगे
कोई गीत ओठें पर आई गेआ
फुल्ल खिड़ी पेऽ साढ़ै हिरखी मन
मनै लोरी भौर सनाई गेआ
चाह् जन्में दी होई गेई पूरी
बिछड़ी दी रूहां मलाई गेआ ।
हर पास्सै न खुशियां गै खुशियां
जीने दी बत्तै ओह् पाई गेआ
दिन- रात सुहाने लगदे हुन
हर शैऽ च हिरख समाई गेआ
नेईं अड्डी हुन भुञै लगदी ऐ
अक्खीं ओह् सुखने सजाई गेआ ।
अपने ते होंदे न अपने गै
गैरें गी अपना बनाई गेआ
हर बेल्लै रूप सुआरनी आं
शीशे दी आदत पाई गेआ
मेरा तन-मन ओह्दा होई गेआ
ओह् जोगन मिगी बनाई गेआ ।
ओह्दी हिरखी नजरां खाई गेइयां
मेरा हिरदे खाल्ली होई गेआ
में निरी आं गंदल स’रेआं दी
मिगी कनकै घेरा पाई लेआ
इं’दे हिरखै सुध-बुद्ध बिसरी गेई
मिगी नच्चना नाच सखाई गेआ ।
-----------------
