शरीरै दा चरखा
ते साहें दी माह्ल रलियै
कतदे न ध्वनियें दा सूतर
बनदे शब्द, बनदी भाशा
फ्ही वाक्यें दे ताने-बूने च
भावनाएं ते विचारें दे डिजाइनें आह्ला
किश बी बनाई लैओ
सैल-सन्हाका, मनछूह्ना, मनभाना ।
किन्ना सैह्ज ते सुभावक बझोंदा ऐ
एह् शब्द-चित्र
पर सारी उमर लग्गी जंदी ऐ
स्हेई शब्द चुनना
स्हेई वाक्य बनाना
ते
मनासब नेहा विराम चिʼन्न लाना सिक्खने च ।
संज्ञा कन्नै शुरू
ते
क्रिया कन्नै सम्पन्न वाक्य
सतह उप्पर दिक्खने च
कामे, पूर्ण विराम
जां सुआल चि’न्न दे बिच्च बज्झी दी
शब्दें दी इक लड़ी गै होंदा ऐ
जिंदगी साहीं ।
