जिंदगी दे मैह्ने तलाशने लेई
केह्ड़ा दर में नेईं ठ्होरदा
कदें मनस-शास्त्रें दे, फ्रायडें, जुंगें दे
चेतन, अवचेतन दा दर
कदें हीगल, सुकरात, प्लेटो, कांट
'बारदो', तंत्र भैरव, अघोरियें दा दर
ओशो, लाओत्सु, गोरख, गुरजियेफ
जिन्न सूत्र, धम्मपद, ज़ेंद अवेस्ता दा दर
केह्ड़ा दर में नेईं ठ्होरदा ।
नानक, कबीर, पलटू, दयाल
रज्जब, राबिया, सहजो, गुलाल
फरीद, बुल्ले शाह, सैफ उल मलूक
मनें दी त्रेह् होर बधाई जंदे
उपनिषद, पुराण, गीता पढ़दे-पढ़दे
उच्चड़े ख्याल न आई जंदे
मनें गी किश भरमाई जंदे ।
पर सच्च इ'यै जेह्
मूढ़ें हत्थें लालो गौहर बी
कौड्डी कसीरे होई जंदे न
में अमल निं करदा वचनें दा
कवितें च परोई लैन्ना आं
में ठ्होरदा रौह्न्नां दर केईं
अंतर अपना कदें ठ्होरदा नेईं
करनां गल्लां ब्रह्मज्ञानै दियां
अपने नै कदें बी बोलदा नेईं।
की जे तपने पौंदा ऐ
सुन्ने गी कुंदन बनने लेई
की जे मिटने पौंदा ऐ
बूंदै गी सागर बनने लेई
हंकार प जीना चांह्दा ऐ
ऐ चांह्दा बूंद बनै सागर
ते बूंद-बूंद बी बनी र’वै
पर एह् कदें बी नेईं होआ
नां गै कदें बी होंदा ऐ
अंतर दा न्हेर मटाने लेई
रत्तु दा तेल बनाने पौंदा ऐ
बखले सूरज कम्म निं औंदे
आपूं गै बलियै, अपना गै
दिया जगाने पौंदा ऐ ।
