दो लैह्रां ते गेइयां लंघी, त्री ने पंगा पाए दा
डटियै एह्दा करो मकाबला,ओमिक्रॉन आए दा।
चौथी गी असें रोकी लैना,यत्न सबूरे करने न
इसने तौलें नस्सी जाना,बाह्रें पैर निं धरने न
संभली जाना पूरी चाल्लीं, जिस चाल्ली समझाए दा
डटियै एह्दा करो मकाबला,ओमिक्रॉन आए दा।
हर बारी एह् भेस बदलदा,गुज्झे हमले करदा ऐ
जेह्ड़ा इसगी मूंह् निं लांदा,ओह्दे कोला डरदा ऐ
बिच्च ग’ली दै रौह्ग बलगदा,अंदरा कुंडा लाए दा
डटियै एह्दा करो मकाबला,ओमिक्रॉन आए दा।
मुहैं उप्पर मास्क लाना,भुल्ल निं करनी मासा बी
फुल्ल पर्हेज़ करना, कन्नै रक्खना इक भरोआसा बी
स्याना उ’ऐ जिसने बोझै,सैनिटाइज़र पाए दा
डटियै एह्दा करो मकाबला,ओमिक्रॉन आए दा।
अपनी जिंद ते बेह्ड़ा, म्हल्ला,देश बचाना जरूरी ऐ
ताप चढ़ै जां खंघ होऐ तां टैस्ट कराना जरूरी ऐ
लड़ने गित्तै ताकत बधदी,टीका जि'नें लोअए दा
डटियै एह्दा करो मकाबला,ओमिक्रॉन आए दा।
