एह् हिदायतां
एह् बंदशां
एह् हिरख-प्यार
रंजशां
एह् दूरियां
नजदीकियां
एह् रिश्ता -रिश्ता
बरीकियां
मेरे गलास तरदियां
मेरे गलास मरदियां
केईं जवाब मंगदियां
केईं सुआल करदियां
शराब गै शराब न
लम्मा -डूंह्गा स्हाब न ।
में हादसें दा हादसा
मेरे न हादसे केईं
शक्ल- शक्ल हादसे
अक्ल- अक्ल हादसे
जरम- मरन हादसा
धर्म-वर्ण हादसे
जैह्न-जैह्न नफरतां
नैन-नैन हसरतां
कागजी समाज च
कागजी न फ़ितरतां
तार -तार बंदगी
ख्वाब- ख्वाब जिंदगी
रोम-रोम राम न
दिलें-दिलें दरिंदगी
एह् बैह्शतां
एह् दैह्शतां
मेरे गलास तरदियां
मेरे गलास मरदियां
शराब गै शराब न
लम्मा-डूंह्गा स्हाब न ।
फिक्र-फिक्र फर्ज़ न
फर्ज़-फर्ज़ कर्ज़ न
जीवन दी पैह्ली चिट्ठिया
बेशुमार दर्ज़ न
मनें- मनें मलाल न
स्वास- स्वास सुआल न
कमाल न ,कमाल न।
एह् आयतां ,इनायतां
एह् कदीमी रिवायतां
मिट्ठा- मिट्ठा ताप न
फिक्की- फिक्की भाप न
शराप न, शराप न
एह् भाईचारे
एह् सरीकियां
एह् मंदर, द्वारे
मसीतियां
मेरे गलास तरदियां
मेरे गलास मरदियां
शराब गै शराब न
लम्मा-डूंह्गा स्हाब न ।
