निक्की जेही गैह्ली ही, साढ़े लेई संसार हा
उत्थै गै मोड़ै उप्पर बसदा ओह् दिलदार हा।
खिड़-खिड़ हासे हे, ब्हाऊ च ही मस्तियां
हर पासै जोवनें दा खलार गै खलार हा ।
मैह्कदे सवेरे हे ते स’ञां हियां नशीलियां
खौरे केह्ड़ी रुत्त ही, खमार गै खमार हा ।
बड़ी पुरनूर ही, साढ़ी बी दिआली अदूं
होलियें दे रंगे बिच्च हिरखी गलाल हा ।
किन्नियां गै अक्खां असें रेहियां बलांदियां
असेंगी ते बस उ'नें अक्खें दा इंतजार हा ।
चन्न हे, तारे हे ते ही खिल्लरी दी चाननी
अस मदहोश हे, मौसमें च शंगार हा ।
केईं-केईं रात्तां जागो-मीटी च लंघी गेइयां
राती-राती मिलने दा टकोह्दा इक थाह्र हा।
शिकल दपैहरी असें कोठें प चढ़ी रौह्ना
में बी शदाई हाँ, तेरा बी पैह्ला प्यार हा ।
असेंगी निं सुध कोई, दुनिया ही सड़दी
किन्ने हे फकोई गे, किन्नें गी बखार हा ।
निक्की जेही गल्ल ही, खौरे केह्ड़ी गल्ल ही
पलै-खिनै त्रोड़ी गेआ जरमें दा यार हा ।
