जि’यां
कृष्ण जी ने कालिया नागै गी नत्थी
यमना गी बिश मुक्त करी
लोकाई दे हिरदे च जीवन दे उत्साह् दा संचार कीता हा।
इ’यां गै
भ्यागै, बडलै
न्हेरे दे काले स्याह् काले
नागी मत्थे पर अपने संदूरी पैर रक्खदा
प्रकृतिक निजमें मताबक
सूरज
नित्त निरंतर नत्थदा स्याह् काले न्हेरें गी।
इ’यां गै
न्हेरे दी दमघोटू गिरफ्त च गिरफ्तार
भामें निक्का, भामें जुआन भामें प्रौढ़
यकीनन जानदा जे
त्रुट्टी जानी मुक्की जानी आखर नागन राती दी गिरफ्त, कुदरत दा नियम ऐ
पर
हांबदा, छड़कदा, तड़फदा इक दलासे गी।
अक्खीं मीटी अपने अंदर दे न्हेरे च
ध्रुक-ध्रुक करदे दिलै दी सरगम दे मालक दा खाका खिच्चदे
आस ऐ उगदे सूरजै आंह्गर,
जि’यां सुनेआ
जि’यां पढ़ेआ
जि’यां मिथेआ
जे ङूठे जिन्ना
हिरदे दी कुसै गुप्त नुक्करै बैठे दा ओह्
लोई दा लड़ फगड़ाई देग
दलासें दियां पिरता पाई देग।
——————————————
