स्कूलै दा, थक्की हुट्टी आइयै
मां आखदी ही, मुड़ेओ
ठंडे पानी दा घुट्ट, पलाओ हां
जे कदें बिंद, चिर होई जंदा
खिंझिये आखदी ही, मोयो
तुसें जींदे जी, निं पलाना
ते मोये दे कुत्थें, बड़ै गी चढ़ानां
हून मां नेईं रेही
ओ बड़ रेही गेआ
कदें में, बड़ै गी दिक्खना
कदें, दूर फैले दे गासै गी
तारें दी मैह्फल सजदी ऐ
पर, मां कुतें निं लभदी ऐ।
असें, जदूं ग्रांऽ जाना
मां ने, बरांडे मंजा डाह्ना
अपने डबल बैडै उप्पर गै
असेंगी सलाना
हून बी जदूं, ग्रांऽ दा फेरा पौंदा ऐ
उ'यै डबल बैड उ'यै कमरा
साढ़े हिस्से औंदा ऐ
हून मां नेईं रेही
ओह् कमरा रेही गेआ
कदें में डबल बैड दिक्खना
कदें सुन्नियें कंधें गी
हर चीज ठकाने लभदी ऐ
पर, मां कुतें निं लभदी ऐ।
म्हेशा आखदी ही मोयो
मेरे पिच्छों नेईं लड़ेओ
कोई ऐबी-नैबी होई बी जा
आपूं च गै सुलझाई लैओ
छिंज निं पाई लैओ
मां बड़ी चलाक ही
खौरे उसगी पता हा
असें उसदी गल्ल निं मननीं
तां गै उ'न्न अपनी फोटो
बरांडे च गै टंगाई होनी
जे ओह् रक्खी सकै नजर
साढ़े हर चंगे माढ़े करमें उप्पर
हून मां नेईं रेही
बस बरांडे च फोटू रेही गेआ
कदें में दिक्खनां फोटुयै गी
कदें दिक्खनां बरांडे दे मंदरै गी
ओह् जोत अजें बी बलदी ऐ
पर, मां कुतें निं लभदी ऐ।
—————————————
