गल्लें दे गुंझल बनाने नेईं
में फुल्ल कागदी सजाने नेईं
छंदें बंधें बिच्च फसाने नेईं
छड़े अक्खर में बनकाने नेईं
में गीत घुटे दे गाने नेईं।
भाएं मुल्ल निं मेरे गीतें दा
में नेईं तलेह्डू रीतें दा
में लोभी उच्चड़े गासें दा
लड़ छुड़ेआ झूठी आसें दा
में रुतबे नांऽ कमाने नेईं
में गीत घुटे दे गाने नेईं।
मेरे गीत बड़े बेढंगे न
तुस आखदे ओ बदरंगे न
में अपने लहुयै ने रंगे न
भाएं औघड़ ने, खुदरंगे न
में जूठे भोग लोआने नेईं
में गीत घुटे दे गाने नेईं।
कोई ऐसी ताड़ी लग्गी जाऽ
मेरी जीभ तालुये लग्गी जाऽ
कोई धुन अलौकी बज्जी जाऽ
इक्क हत्थै दी ताली बज्जी जाऽ
में कैंको रोले पाने नेईं
में गीत घुटे दे गाने नेईं।
—————————————
