पल-पल
हर-पल
कतरा-कतरा
भुरदी-खुरदी
जा करदी ऐ मेरी में।
एह् आं
ओह् आं
एह्के भरमें
ओह्के भरमें
गुजरे वक्ते
इच ऐ लाडो
खूब पसोई
खूब मठोई
इसदी होई
उसदी होई
नचदी फिरी
बनी शदाई
रूह्-रूह् सच्च कबूली अज्जकल
टीसियां ढलदी जा करदी ऐ मेरी में।
हौला भारा
सब खलारा
ताली तुम्बी
स’ल्ली-सोती
निर्मल जन ऐ
होई खड़ोती
ढलदे ढक्क
व गोड्डे दुक्खन
खारे, नेडै-नेडै
ढुक्कन।
ब’री-ब'री चित्त खाल्ली करदी
मिकी प भरदी जा करदी ऐ मेरी में।
कुद्धर जाना?
कु’त्थै पुज्जी
मते चिरें इन्न
सार ऐ बुज्झी
ताल-बेताली
सुद्धी नच्ची
जतने लब्भी
ताल फ्ही सच्ची
फामी होई दी
नच्ची-नच्ची
खूब निखरदी जा करदी ऐ मेरी में।
—————————————-
