कदें कदें इ'यां बझोंदा
में इक नेईं अश्कै अस दो आं
अक्खां दिखदियां, ते कोई
अक्खें राहें, दिखदा ऐ
कन्न सुनदे ने, ते कोई
कन्नें राहें सुनदा ऐ
जीह्ब बोलदी ऐ, ते कोई
चुप-चबीता बेही रौंह्दा ऐ
देह चलदी ऐ, ते कोई
न हिलदा ऐ न डुलदा ऐ
साह् अंदर बाहर, होंदे ने
ते कोई छड़ा दिखदा रौंह्दा ऐ
में शशोपंजे च, पेई गेदा आं
इ'नें दौनें च, में केह्ड़ा आं
अक्ख, नक्क, कन्न, जीह्बै दा जोड़
जां, दिखदे रौह्ने आह्ला
चुप-चबीता, भेतें भरेआ
जम्मनें शा मरने तक
उ'यां दा उ'यां
म्हेशा, नमां नकोर
शाश्वत, सनातन
किश-किश समझ ते औंदा ऐ
पर मता किश पल्लै निं पौंदा
मिगी अपने गै होने दा
किश भेत निं पौंदा।
—————————-
