आईंस्टाईन आखदा E=mc2 दा इ'यै विज्ञान
जिस बेल्लै अणु दे कन्नें टकरांदा कोई न्यूट्रॉन
जां कदें मिली ने जंदे प्रोटान ते प्रोटान
ऐसी ऊर्जा निकलदी जिसदा निं कोई स्हाब
कल्याण करो भामें, हिरोशिमा जनेहा विनाश
इ'यै ऊर्जा आखदे सूरज तारें दा ताप
पदार्थ बिच्च ऊर्जा बसदी ऊर्जा बिच्च पदार्थ।
पदार्थ ऊर्जा सिद्धांत पढ़िये में सोचेआ
मोये दे इ’नें पदार्थे बिच्च जेकर ऐ इन्नी जान
केह् होयै जिंदा कोशकें गी त्रोड़े कोई न्यूट्रॉन
मानव शरीर बनी सकदा ऐ सर्वशक्तिमान?
लक्ख धलोफी फिजिक्स ते होर बी विज्ञान
कुतै निं मिलेआ ऐसा नोखा कोई बी ग्यान।
फ्ही इक्क दिन सैहबन गै चेते आए पराण
परती परतिये आखदे हे बंदा गै भगोआन
सोचेआ कोई चाबी ऐ जिसी आखदे 'ध्यान'
बंदे दी कोशकें गी खौरे त्रोड़दा इ'यै न्यूट्रॉन
जिस बेल्लै माहनू छडदा लोभ मोह् हंकार
अक्खरें दे गुंझल त्रोड़ी होई जंदा निर्विचार
अणु बम्ब फट्टी पौंदे होने लक्ख करोड़ ज्हार
ते फ्ही खिड़ी पौंदा होना कमल कोई सहस्रार
र’ली जंदी होनी ऊर्जा कुसै ब्रह्म ऊर्जा कन्नें
बंदा-बंदा निं रेही जंदा, होई जंदा भगोआन
खौरें ऋषि मुनी आखदे इसी गै विरला ज्ञान
ब्रह्म दे बिच्च बंदा है बंदे बिच्च भगोआन।
पर अस गल्लें दे गझोकड़ गल्लां गै दीन ईमान
गल्लें बाझों कक्ख निं अस गल्लां साढ़ी शान
क्षुद्र तौले निं छुड़कदा न गै सौखा विराट महान
अपनी नीति बंदा भटकदा केह् करै ऊर्जा विज्ञान।
———————————————————-
